جايتكس 2008 .. لا تضيّع وقتك !!

كعادة معرض جايتكس، يبدأ وينتهي بدون أي فايدة .. مو قادر أستنتج إلى الآن الهدف من المعرض هذا ..

يقولون ويصفون المعرض بأنه عرض لأحدث مستلزمات التكنلوجيا وما شفنا شي .. الظاهر والله العالم المقصود من كلامهم هو “استعراض لشركة لجوال وموبايلي وباقي الشلة السعيدة” لكنهم اخطأوا التعبير !!

شيء مخزي فعلاً .. معرض ما منه أي هدف .. نفس الشركات المنتشرة في السعودية ونفس المحلات جمعوهم في مكان واحد، والهدف؟!! ولا شي!! .. لاعروض، لا منتجات جديدة،ولا اسعار زي العالم والناس!! .. وما فيه في المعرض غير هالابتوب والجوالات .. تقول ما فيه شي غيرهم !!

طبعاً ما يفوتني ان اقول ان المعرض تم تقسيمه بطريقة عبقرية جداً .. 45% لشركة الجوال، كم مكتب على كم كرسي والشباب مستريحين وداقينها سوالف ووناسة .. و45% لشركة موبايلي، نفس الوضع السابق بالضبط لكن مع دبابات وملعب كورة متر×متر حق المسابقات .. اما النسبة الباقية اللي هي 10% لبقية الشركات المصونة ..

ما اقول غير الله يخلف على حالنا .. جايتكس دبي وصل العالمية واحنا معارضنا ما غير تشوف منتجات الجوال وموبايلي تقول ما فيه شركات غيرهم ..

خلاصة الحديث/ نصيحة أخوية، لا تضيّع وقتك وانا اخوك …