بابا سامحني

قبل امس، كنت أتمشى وأنت وواحد من اصحابي في احد المجمعات التجارية .. وبدأت اطالع في الناس الرايحة والجاية ..

وطبعاً ما يخفى عليكم المناظر الرهيبة الجديدة اللي بدأت تنتشر في مجتمعنا الراقي، سواء كانت من الشباب أو البنات .. بدايةً من ملابس فاضحة، وانتهاءً بالبوكسرات الملونة !!

كل هذي الحاجات صارت امور طبيعية تشوفها في كل مكان ولا تستغرب لأنها “الموضة” !! ..

إلى أن شفت موضة جديدة، مجموعة من شباب “البوكسر” و”الكدش” يمشون مع بعض ومعاهم مجموعة جديدة غريبة، لابسين البنطلون بالمقلوب!! …. واخزياااااااه .. وش ذا؟!! سحّاب من ورا؟!! ابو الشباب ما يعرف يلبس بنطلونه والا كيف؟!!

ناديت صاحبي وقلت له: وش السالفة؟!! ورا ابو الشباب قالب البنطلون ؟!!

ناظرني صاحبي ببراءة وقالي بصوت هامس: بابا سامحني !!

استغربت، قلت له بنفس البراءة: اسامحك على ايش يا ولدي؟!!

قال لي: هذي اسم الحركة يا غبي!!

انفجرت من الضحك .. اسم رهيب من جد … يا ساتر !! المسكين ابوه زعلان عليه، ويبغى يراضيه بموضة “بابا سامحني” .. يالله، من جد حاجة مؤثرة 😦

طبعا بعد هذا المشهد المؤثر، اشتغلت عندي غريزة “اللقافة” .. وبما إن محدثكم ولله الحمد يُعتبر من النوعية اللي “وجهه مغسول بمرق” لحقت شبيبة البابا سامحني .. ولما وصلت عندهم تنحنحت حتى ينتبهوا لي، وقلت: احم ….. بابا .. بابا ليه ما تسامحني ؟! …. 😦

واترك للقارئ الكريم التخمين لما حصل بعد ذلك 😛